ДЮРДЬОВ – У Церкви Рождествa Пресвятей Богoродици у Дюрдьове, внєдзелю 7. юния була Перша свята причасц на котрей седмеро першопричашнїки приступели до Святей тайни причасци.
Значна подїя за християнски живот наймладших одбула ше у Велькей Служби Божей котра була на 10 годзин, а котру служели о. Дамян Кича, ЧСВВ, зоз Кули и домашнї парох о. Михаил Холошняй.
Першопричашнїки були школяре котри закончую другу класу, медзи нїма було штверо хлапци и три дзивчата; Александар Римар, Александра Пап, Андрей Киш, Ана Шанта, Иван Балїнт, Ленка Станкович и Марко Сеґеди. Вони од домашнього священїка о. Холошняя, по законченю Служби, достали по урамиковани образ зоз своїм зашитнїком на основи кресного мена з пошвеценьом на хрибце образа, як и Грамоту же би им остало як памятка на тот значни дзень.
За першу причасц их порихтала їх вироучителька у Основней школи „Йован Йованович Змай”, Татиaна Барна.
На концу Служби священїки и присутни на служби, першопричашнїком одшпивали Многая лїта, а потим святочносц предлужена у парохиялним доме зоз святочним фриштиком и друженьом з найблїзшима и парохиянами.