КОЦУР – У Грекокатолїцкей церкви Успения Пресвятей Богородици у Коцуре внєдзелю, 7. юния, ґу першей Святей тайни причасци приступели 15 школяре трецей класи основней школи. Дзень пред тим вони ступели и до першей Святей тайни споведзи.
Вельку Службу Божу на 10 годзин служел декан бачки и парох коцурски о. Владислав Рац котри з тей нагоди привитал 7 хлапцох и 8 дзивчата котри прияли першу причасц. Числени члени фамелиї и родзини малих першопричашнїкох того святочного дня виполнєли церкву.
Шицким хлапцом и дзивчатом першопричашнїком вироучителька Ксения Бесерминї подзелєла грамоти же би их здогадовали на тоту значну подїю за їх християнски живот, а кажде дзецко достало и молитвенїк як дарунок од Церковного одбору.
За першу причасц школярох пририхтала вироучителька Ксения Бесерминї, а на шветочносци присутни були и їх учительки зоз коцурскей Основней школи „Братство єдинство” Славица Чельовски и Виолета Рашета и учитель Марко Буила, як и директорка Школи Сенка Мученски.
