НОВИ САД ‒ У Конкатедралней церкви св. апостолох Петра и Павла, внєдзелю 7. юния пецеро дзеци прияли першу причасц. З тей нагоди парох о. Дарко Рац им подаровал грамоти и модляци пацерки.
Першираз приступели ґу Святей першей причасци: Теодор Бучко, Катарина Медєши, Настася Корпак, Павле Корпак и Мирослав Корпак, парох им повинчовал и пожадал най их Исус водзи у їх живоце, а поручел и же Христа треба шлїдзиц и поряднє приходзиц до церкви.
З тей шветочней нагоди парох и першопричашнїки подзековали длугорочней вироучительки Меланиї Римар, хтора 26 роки тримала виронауку и на парохиї и грекокатолїком у новосадских основних школох и рихатала дзеци за першу причасц. Першопричашнїца Катарина Медєши пречитала пригодну писню, а парох Дарко Рац вироучительки за подзековносц придал малюнок новосадскей церкви, хтори намальовала Мария Канюх. Тиж привитана и нова вироучителька шестра Доминика, хтора почнє тримац виронауку од септембра.
