ШИД – Горватске културно уметнїцке дружтво „Шид” з нагоди означованя 16-рочнїци oд снованя всоботу, 6. юния на лєтней бини отримало концерт.
Концерт отворели домашнї танєчнїки зоз танцами вязанима за обичаї коло жита, а потим як госци наступели члени КПД „Дюра Киш”.
Старша шпивацка ґрупа у провадзеню оркестра Дружтва, руководзаци Драґан Макивич, а под руководством Снежани Лазич, одшпивала шпиванки „Явор, явор”, „Як вода в поточку” и „Три гвиздочки на нєбе”.
Печац концерту дали госци зоз ГКУД „Матия Ґубец” зоз Руми и то Вельки тамбурови оркестер и вокални солисти хтори указали лєм часц богатого музично-шпивацкого репертоара.
Румлянє ше тиж представели и зоз танєчнима точками и то младши танєчнїки з танцами зоз Сриму, а старша ґрупа з танцами зоз Банату.
Концерт заварли домашнї танєчнїки, старша ґрупа зоз танцами зоз сушедного валалу Сот, а друженє потим предлужене на вечери хтору порихтали орґанизаторе.
