НОВИ САД – Дзецинска крачунско-новорочна програма „Пахулька” у преполней сали Руского културного центра отримана вчера, 17. децембра.
Тогорочни концепт програми бул дакус иншаки, бо публика мала нагоду премиєрно одслухац радио драму „Воденїчка на стриберним потоку” Мирона Будинския. Дзеци барз крашнє реаґовали на тоту сказку попреплєтану зоз звучнима ефектами и музику, док ше на видео-биму емитовали дзепоєдни илустрациї и рисунки зоз кнїжки. Тот проєкт реализовани вєдно зоз НВУ „Руске слово”, а з финансийну потримовку Заводу за културу войводянских Руснацох.
Друга часц програми була виполнєта зоз музичнима и рецитаторскима точками котри виведли дзеци цо уча руски язик як виборни предмет у новосадских школох, а у хору шпивали и наймладши. Учительки Оля Яковлєв, Ана-Мария Рац и Ванеса Медєши нє лєм же пририхтали програму, алє и поволали родичох же би приведли и мали дзеци котри жадаю з нїма шпивац и участвовац у активносцох. Програму водзела Петра Станисавлєвич, а учашнїкох на клавиру провадзел Йован Бєлица.
На концу програми дзеци зоз шпиванку доволали Дїда Мраза котри им подзелєл новорочни пакецики.
„Пахульку” потримала Городска управа за културу Городу Нови Сад.