РУСКИ КЕРЕСТУР – Здруженє гражданох „Пакт Рутенорум”, пияток 17. априла, орґанизовало Квиз общей култури.
Свойо знанє у 8 катеґорийох: история, тривия, кнїжовносц, лоґика, спорт, ґеоґрафия, музика и филми и сериї, преверели 8 екипи. Питаня ше пущали прейґ видео-проєктору а кажда екипа за столом мала папери на хтори уписовала одвити.
Член Пакту и єдна зоз орґанизаторкох квизу Анита Чизмар подзековала шицким екипом хтори участвовали и пришли потримац цошка иншаке и нове. „Намагаме ше орґанизовац цо вецей случованя и пробуєме чуц цо вецей предкладаня на хторих би людзе, а першенствено млади, жадали участвовац. На анкети хтору зме положели на мрежи, єдна зоз найвецей раз предложених идейох бул праве квиз”, поручела Чизмарова.
Шлїдуюце случованє у орґанизациї младих Пакташох будзе турнир у дружтвеним бависку „Катан”, хтори будзе отримани на соботу 25. априла на Ярашу.
