КОЦУР – З нагоди ювилейного 20. родзеного дня коцурского Мото клуба „Пеґасус”, традицийне Мото стретнуце отримане за викенд, од 5. по 7. юний, у дворе просторийох клуба при стадиону Фодбалского клубу „Искра”. Перши викенд у юнию реґистровани як Мото стретнуце у Коцуре у Мото-униї и Войводини.
И того року сход байкерох тирвал два днї, а домашнї дочекали числених госцох зоз жеми и иножемства уж пияток рано кед перши моторкаше почали сциговац до валалу. Госци привитани зоз добру рок музику и традицийним полудзенком, а байкерох було зоз околних державох, алє и зоз числених местох зоз цалей Сербиї.
Мото стретнуце провадзене зоз наступами рок ґрупох, та пияток наступела ґрупа „Dioniz” и „Андрия Диша бенд”, а всоботу отримани концерт ґрупох „ Poslednja šansa”, „Fisherman and crocodiles” и „Rock Trajanja”.
По словох орґанизаторох, цале стретнуце и друженє байкерох прешло у найлєпшим шоре, а гоч хвиля була кус пременлїва, по конєц их попровадзели красни и цепли днї.
Другого дня на Мото стретнуцу була и традицийна „байкерска пасуля”, як и велька торта з котру ше засмачели и шицки нащивителє, од наймладших по найстарших.
Числени любителє моторкох до позних годзинох уживали у друженю и добрей рок музики.
