6. ЮЛИЙ – На нєшкайши дзень народзени учитель и културни дїяч Витомир Бодянєц.
1785 – Континентални конґрес преглашел долар як урядову валуту Зєдинєних Америцких Державох.
1855 – Народзел ше сербски войвода Живоїн Мишич, учаснїк у шицких войнох Сербиї од 1876. по 1918. рок.
1885 – Биолоґ и хемичар Луй Пастер першираз успишно применєл вакцину процив збешнєтосци на людзох.
1928 – У Нюйорку отримана премиєра филма Шветла Нюйорку (Lights of New York), першого звучного филма у историї кинематоґрафиї.
1932 – Народзел ше учитель, културни дїяч, ґлумец-аматер, хорски дириґент и композитор Витомир Бодянєц (Руски Керестур, 6. юлий 1932 – Руски Керестур, 20. юний 1995). Основну школу и нїзшу ґимназию Витомир Бодянєц закончел у Руским Керестуре, а Учительску школу у Суботици. Робел як учитель у Новим Садзе, Руским Керестуре и Новим Орахове, потим бул директор школи Основней школи Петро Кузмяк. На тризаводи бул директор керестурского Дому култури, дзе бул и театрални режисер, дириґент хору, автор музики вецей нових руских шпиванкох у народним духу, вокални солиста, хореоґраф и корепетитор. Єден є зоз сновательох и реализаторох Драмского меморияла Петра Ризнича Дядї, як и єден зоз сновательох Аматерского руского театру Дядя. Витомир Бодянєц ґлумел у 41 театралним фалаце, 4 раз ше зявел як режисер, а двараз бул асистент режисера. Умар 20. юния 1995. року, поховани є на теметове у Руским Керестуре.
Нєшка Медзинародни дзень бочканя (World Kiss Day). Дзень запровадзени у Велькей Британиї 2000. року, а наука хтора виучує поцилунки и ефекти на людзох наволана филематолоґия.