РУСКИ КЕРЕСТУР – Валалчанє хтори биваю коло беґельчика КЦ 3, хтори познати як Стари беґель хтори ше находзи коло улїчкох Ґабра Ороса и Якима Салонтая, остатнї час ше поносовали на смрод и високи над, пре хтори скоро нє було видно анї хижи.
Проблем на вецей заводи приявйовани до одвичательних институцийох а його ришованє почало перше зоз кошеньом бенту, а потим и зоз приходом велького баґеру Водопривредного привредного дружтва ДТД „Сиверна Бачка”, такволаного гердеру зоз длугоку „руку”, на сам початок цеку беґельчика КЦ 3-26, одкаль почало винїманє наду у цалей длужини по улїв до велького беґелю. Гоч найвекши проблем бул такповесц у валалє, коло хижох, баґер рушел од початку пре природни цек беґельчика, же би ше над хтори ше винїмал нє врацал алє ишол по драги кадзи ишол и баґер.
Роботи на вичисцованю бегельчика прешлого тижня нащивели руководитель технїчней часци Водопривредного привредного дружтва ДТД „Сиверна Бачка” Филип Вуйович и секретар Месней заєднїци Руски Керестур Михайло Пашо, хтори обишли терен и визначели же робота поробена у вкупней длужини скоро 5 километри. Єдини проблем, як визначене, тото же кед ше зоз Русинскей улїци скруци до Улїци Орос Ґабра єст отприлики коло 80-100 метери беґельчику дзе баґер нє може дойсц пре узки мосцик, алє поведзене же ше и за тоту часц пробує найсц даяке ришенє.