НОВИ САД/РУСКИ КЕРЕСТУР – Коло трицец члени Здруженя паприґарох Руского Керестура нєшка буду присуствовац на 16. Науково-фаховим сходзе „Сучасна продукция желєняви”, хтори у Велькей сали и голу Мастер центру на Новосадскикм сайме орґанизую Войводянске дружтво заградкарох и Одбор за валал Сербскей академиї наукох и уметносцох.
Спомнути сход єден з найпознатших у тей обласци у Сербиї, так же на нїм присуствую продукователє желєняви з цалей держави, котрим фаховци з жеми и иножемства кажди рок понукаю сучасни можлївосци за унапредзенє и пласованє продукциї.
Науково-фахови сход „Сучасна продукция желєняви” нєшка почина на 10 годзин, а потим до 15 г. ушлїдза два блоки зоз седем преподаванями фаховцох з рижних обласцох вязаних за заградкарство.
Медзи преподавателями и Владимир Сабадош зоз зомборске Польопривредней совитодавней станїци, котри вєдно з Оливеру Секулич будзе бешедовац о уплїву мрежох на урожай и квалитет паприґи.
Под час Науково-фахового сходу, у голу Мастер центру будзе и вистава желєняви, на хторей Керестурци представя продукти з паприґи, нашенє паприґи, як и рекламни материял Здруженя паприґарох и Дньох керестурскей паприґи.