ВЕРБАС – После спортскей часци на Централней преслави Националного швета Руснацох, у просторийох КПД „Карпати” у Вербаше вредни ґаздинї пририхтали етно-стол.
Стол задумани же би нас шицких здогаднул на єдла хтори дакеди нашо предки прихтовали каждодньово и за вельки швета, та на столє виложени традицийни єдла хтори ше рихта за Крачун – риба на тепши, капущанїки, бобальки, орехи и мед; за Вельку ноц – барена шунка, колбаса, сирец, вайца, хрин, як и каждодньово єдла у тей часци рока – студзенїна, сланїна, курени колбаси.
На столє були и єдла хтори ше ношело на польо – сланїна, цибуля, барени кромплї, алє и лакотки, як цо то ґоргелї, белюши, геровци, лабии, рейтеши. Велї нащивителє таки єдла з тей нагоди у Вербаше пробовали першираз.
Координатор тей чсци преслави була Нада Лендєр, котра надпомла же прирхтованє єдлох нє чежке, алє вимага часу и сцерпеня. На тот завод стол пририхтали дванац жени, а нарихтане тельо же остало и за „бичак”
