НОВИ САД – Новосадски предшколски дзеци, котри ше раз тижньово знова буду сходзиц у обєкту „Палчочка” ПУ „Радосне дзецинство”, вчера ше першираз зишли у тим школским року. Дзецом предшколского возросту з тей нагоди уручени роботни лїстки „Уж видзим школу”, а виховательки кнїжка композицийох за дзеци „Червене пупче” з дотерашнїх „Червених ружох”.
Дзеци и родичох привитала подпредсидателька Дружтва за руски язик, литературу и културу Ирина Папуґа, а на вчерайшим стретнуцу присуствовал и предсидатель Националного совиту Руснацох Славко Рац, котри Ирини Папуґовей и виховательки Ивани Шарик подзековал на їх упартосци и ентузиязму у обновйованю виучованя руского язика у Новим Садзе и на предшколским уровню.
– Дзекуєм на нєсебичним закладаню таким поєдинцом, цо Руснацом барз важне, же бизме ше у єдним вельким городзе як Нови Сад нє страцели. Нашо дзеци и през бависко можу барз лєгко научиц мацерински язик и тоту можлївосц им нє треба однїмац. Национални совит у тим мандату жада дац окремни акцент на предшколски дзеци, прето же кед ше нє упишу до предшколскей установи на руским язику, страциме цалу ґенерацию и после их вельо чежше уписац до руских оддзелєньох основней школи. Ми им поможеме и з тима учебнїками – роботнима лїстками, же би им ученє язика було лєгчейше и интересантнєйше – гварел Славко Рац.
Воспитно-образовни активносци за наймладши дзеци у Новим Садзе буду раз тижньово у обєкту „Палчочка”, у Улїци Бранимира Чосича 40.
