ОСИЄК – У орґанизациї КУД Руснацох Осиєк, а з допомогу у кнїжкох Союзу Русинох Републики Горватскей, всоботу, 28. фебруара у просторийох спомнутого Дружтва отримани литературно-музични вечар и промоция кнїжки „Дом у шерцу”, авторох з Вуковару Меланиї Пап и Звонимира Барни.
Поезию читали члени КУД Руснацох Осиєк и госци з Вуковару, як и Звонимир Барна. У музичней часци участвовал хор и тамбурови оркестер домашнїх, котри одшивали штири пригодни шпиванки. Окремну музичну часц – з виводзеньом шпиванки „Качмар дай нам вино”, на ґитарох у нєзвичайним аранжману приготовели Владимир Саша Силика и Оґнєн Здравкович. Оґнєн Здравкович на клавиру одграл и Шопенов Ноктурно у Б-молу.
Модератор вечару була Агнетка Балатинац, а о кнїжки бешедовали главна и одвичательна редакторка информованя и видавательства Союзу Русинох РГ Вера Павлович, редакторка тей збирки поезиї Любица Гаргай и рецензент Блаженка Будимчич.
