Бул на Сайме ловарства у Луцерну, а нащивел Берн и два векши роботнї за вирабянє скори без хаснованя хемийних средствох, и за правенє облєчива зоз скори.
У роботи вше треба провадзиц тренди кед ше сце обстац на тарґовищу, а так роздумує и Мирослав Сорочко, кушнїр з Беркасова, хтори бул у марцу у иножемстве. Здруженє женох Южней Бачкей (у хторей були осем жени и троме хлопи) нащивело Брисел, а медзи нїма бул и вон, як член делеґациї. Вон там бул на стретнуцох хтори орґанизовани малим привреднїком, на хторих спатрени можлївосци векшого вивозу до ЕУ, як член делеґациї у хторей були представнїки Привредней комори Войводини и Мисиї Сербиї при ЕУ. Сорочко до Бриселу однєсол першняки и там представел свойо ремесло. Медзитим, як нам гварел, там нєт вельо людзох з наших просторох, та анї вельо нагоди за пласман продуктох.
Наш собешеднїк мал ище єдну дїловну нащиву, алє, як надпомина, у особней режиї до Швайцарскей, дзе путовал вєдно зоз сином Михайлом. Там були на Сайме ловарства у Луцерну, а нащивели и Берн.
– Єден чловек ми помогнул же бизме ше догварели коло нащиви, та зме у Берну були три днї. Нащивели зме двох поднїмательох – кушнїрох. У єдного цо зме були зме видзели малу фабрику, основану ище 1875. року, у хторей заняти коло 30 роботнїки. Цо ше дотика роботи и самей продукциї, ми нє заоставаме за Швайцарску. Там ше скору вирабя без хаснованя хемиї, цалком еколоґийно, а у нас ше ище вше хаснує хемийни средства и то велька розлика у продукциї – гвари Мирослав Сорочко.
Там ше зоз скори продукує тиж першняки, якни, шапки и рукавици. Сорочко роздумує повязац ше зоз швайцарским продуковательом, точнєйше робиц за ньго и то дома, у своєй роботнї у Беркасове. Свидоми є того же би вец и вон мушел вирабяц скору так же би нє хасновал хемийни средства. За тераз тото ище лєм планує. Кед би ше догварел з продуковательом, вироятно би мушел пойсц до Швайцарскей на два-три мешаци там ше едуковац, алє, як гвари, вше є порихтани научиц дацо нове и хасновите у продукциї.
– Думам же би було барз добре кед би ше витворело тото цо зме задумали. Мам сербске и горватске державянство, котре би ми вельо того оглєгчало. Тиж, у Горватскей мам положени майсторски испит з кушнїрства и вельо искуства у тей роботи, а то ше там барз ценї – гвари Сорочко.
И син у тей роботи
У кушнїрскей роботи Мирославови вше частейше помага и син Михайло, котри и учи ремесло. Мирослав набавел и сучасну машину за вишивки.
– Тарґовищу треба понукнуц вше дацо нове, а то тераз рижни вишивани, такволани апликациї, наприклад, за ловарох на облєчиве и подобне. На тей машини за вишиванє апликацийох почал робиц син, а як треба робиц, научел го єден майстор зоз Старей Пазови – гвари Мирослав.
