Од януара 2014. року кед Сербия почала прегварки о членстве у Европскей униї, по нєшка отворела осем и дочасово заварла два од вкупно 35 поглавйох, кельо єст у прегваряцким процесу. По тераз отворени поглавя: 32 о финансийней контроли, 35 о инших питаньох, хтори ше у случаю Сербиї одноша на нормализацию одношеньох зоз Косовом, 23 о правосудстве и основних правох, 24 о правди, шлєбоди и безпечносци, 5 о явних набавкох, 25 о науки и виглєдованю, 20 о поднїмательстве и индустрийней политики и 26 о култури и образованю.
Очековало ше же темпо отвераня поглавйох будзе исц швидше. понеже ше капацитети и институциї Сербиї почали ускладзовац зоз ЕУ ище 2004. року. Швидкосц приступаня завиши од вецей факторох, а прегваряцки процес вшелїяк, попри свойого технїчного, ма и политични критерий. То ше указало у случайох зоз блокаду Горватскей у отвераню поглавя 23, кед зауваги у вязи зоз положеньом їх меншинох мали и Румуния и Болгарска, а подобне ше повторело и коло поглавя 26. Тиж так, нормализация одношеньох Беоґраду и Приштини ше мера при каждим отвераню нового поглавя, та то будзе критерий за швидкосц и квалитет напредованя Сербиї и надалєй. Попри тим, 2017. будзе рок у хторим ше отрима виберанки у даєдних зоз ключних державох членох ЕУ, а їх резултати укажу же яка сущна потримовка предлуженю интеґрацийох знука самей ЕУ и концепту придружованя у двох швидкосцох.
Як вецей раз повторйовали урядово особи и зоз Сербиї и зоз Бриселу, напредованє у евроинтеґрацийох завиши од самей держави кандидата. Поглавя 23 и 24 єдни зоз комплекснєйших и буду заварти медзи остатнїма, а гевто цо ше вимага то континуоване напредованє у панованю правох, реформи правосудства, почитованю шлєбоди медийох и основних правох. Кельо ми як кандидати напредовали у тих обласцох мож видзиц у факту же початком фебруара Европска комисия вимагала од Сербиї же би одблокировала роботу и уважела звити Аґенциї за борбу процив корупциї и Совиту за борбу процив корупциї, же приватизация медийох нє принєсла жадану транспарентносц у власнїцтве медийох, алє додатни проблеми локалним медийом, окреме гевтим хтори информую на меншинских язикох, же ше бешеда мержнї часто толерує и нє санкционує… То лєм даєдни з прикладох.
Сербия ше пририхтує за отверанє ище 14 поглавйох за хтори оценєне же их може отвориц без додатних условийох. То поглавє 1 – шлєбодне рушанє роби, 19 – социялна политика и обезпечованє роботи и 22 – реґионална политика и координация стуктурних инструментох, хтори би могли буц отворени концом рока. Пред тим могли би буц отворени и поглавя 27 о животним штредку и климатских пременкох и 29 о царинскей униї. Гевто цо ше меня у шлїдуюцей фази приступного процесу – Уния змоцнї надпатрунок примени догвареного. Причина то тото цо нам була слаба точка шицких тих рокох – идзе нам досц помали.
Становиска висловени у тим тексту виключно авторово и нє вше одражую ушорйовацку политику новинох „Руске слово”.