БЕОҐРАД – Вчера почало применьованє нового Закона о зопераню насилства у фамелиї, як значни нормативни акт за зоперанє насилства над женми и дзецми и за превентивни уплїв же би до насилства анї нє пришло, а у хторим важну улогу маю тоти котри одредби Закона буду применьовац.
Як вчера наглашела заменїца Заштитнїка гражданох Ґордана Стеванович, єдна з важних новосцох Закона то нагла мира висельованя насилнїка з квартелю (обисца), без огляду на тото же чи є його власнїк, цо скорей нє було. З тим ше, як гварела, жертвом насилства посила ясну поруку же воно будзе санкционоване.
Як преноша медиї, вчера уж вирекнтута и перша мира висельованя насилнїка з обисца, перше на налог полицая, на 48 годзини, а потим и на 30 днї на предлог Тужительства.
Закон приноши институцийну черанку информацийох у системи установох хтори ше занїмаю зоз защиту женох жертвох насилства и ясно одредзує сотруднїцтво тужительства, полициї и шицких котри у системи защити женох и дзецох жертвох насилства.
Як гварела Стевановичова, значне же би шицки институциї – полицияї, центри за социялну роботу, тужительство, здравствени роботнїки на прави способ третировали жертву насилства кед го прияви, а тиж и же би политичаре посилали ясни поруки же насилство нєприлапююце.
После обиходзеня Сербиї и розгварки з професионалцами за остатнї два мешаци, Стевановичова, як гварела, дошла до спознаня же ше правосудство и полиция прилагодзую применьованю нового закона, алє даєдни центри за социялну роботу ище нє, а їх улога значна. Прето обчекує же буду одвитовац гевти котри ище нє поробели тото на цо их Закон обовязує.