КУЛА – На тогорочним Обегованю товаришства, хторе було отримане всоботу, 20. юния у Кули, участвовали вецей як 700 обеговательох зоз Сербиї и реґиону. Старт бул при главней пошти у Крамеровей улїци.
Од 17 годзин бежали дзеци од першей по осму класу и дзеци предшколского возросту, на 100, 200, 300, 400 и 500 метери, а на 18 годзин термин бул резервовани за главне обегованє, бежанє на 5 км, 10км и Нордийске ходзенє на 5 км. Перше место на 10 км освоєл Серґей Костич, хтори пребегнул одредзену дистанцу за 31:27 минути, док на обегованю на 5 км, перше место освоєл Дюро Борбель зоз вибежанима 15:39 минутами.
На Обегованю товаришства вкупни наградни фонд бул 420 тисячи динари.
Обеговало ше у рижних дисциплинох: 10 км (х/ж), 5 км (х/ж), 10 км ветеранє, 10 км Кулянка, 5 км Нордийске ходзенє (х/ж). Зоблєкальнї були обезпечени на стадиону „Милан Среденович” – ФК Гайдук 1912. Водитель програми бул РТС спортски новинар Радослав Симич.
На Обегованю товаришства участвовали и 8 атлетичаре зоз АК Русин: 1. Давид Пашо, 2. Даниєла Рамач, 3. Лара Новакович, 4. Маша Дудаш, 5. Андєлина Блаґоєвич, 6. Миа Сабо, 7. Давид Гарди и 8. Алекса Шомодї. Найлєпши успих посцигнул Алекса Шомодї, хтори у катеґориї 7. и 8. класи завжал одличне 2. место и освоєл стриберну медалю, погар и пакет продуктох Яфа.
Треба визначиц же були присутни и єдна з дакедишнїх найлєпших наших атлетичаркох у бежаню Оливера Євтич и наша дакедишня найлєпша рукометашка на швеце Светлана Китич.
Орґанизатор Обегованя товаришства у Кули бул АК Гайдук Маратон тим Кула, док покровитель була Општина Кула.
