СВИДНЇК (СЛОВАЦКА) – Виводзацка фолклорна ґрупа Руского културного центра Нови Сад и Старша фолклорна ґрупа КУД Жатва з Коцура наступели на найстаршим фолклорним фестивалу у Словацкей, 72. Швету русинско-українскей култури у Свиднїку, од 19. по 20. юний.
Пияток пополадню, 19. юния, на площи у центре Свиднїку, новосадски фолклораше наступели зоз хореоґрафиями Коломийка и Гуцулка, а коцурски з хореоґрафию Буковински парубоцки танєц. Всоботу вечар, 20. юния, у главней програми фестивала, у амфитеатру, у єдним блоку ше представели и коцурски и новосадски фолклораше – Новосадянє наступели з хореоґрафиями По земплински и Ти шугаю, а Коцурци з хореоґрафию Куцкуруши. Руководитель Виводзацкей фолклорней ґрупи з Руского културного центра Нови Сад Владимир Иван Вева, а руководителька Старшей фолклорней ґрупи КУД Жатва з Коцура Александра Горняк.
Попри велького числа домашнїх шпивацких и танєчних ансамблох, нашо аматере и того року були єдини госцуюци танєчнїки з иножемства, бо наявени ансамбл з України анї того року нє могол припутовац. Наступел лєм трио Закарпатского народного хору з Ужгороду, под руководительством Наталиї Петий-Потапчук.
У рамикох 72. Швета русинско-українскей култури у Свиднїку, пияток 19. юния, у Музею українскей култури у Свиднїку була шветочносц з нагоди 70-рочнїци од снованя Музею українскей култури, на котрей присуствовал и Микола М. Цап, представнїк Союзу Руснацох Українцох Сербиї. Вон з тей нагоди повинчовал домашнїм вельки ювилей и уручел директорки Людмили Ражиней Каталоґ предметох Музейней збирки Руски Керестур, здогадуюци же автор першей постановки тей збирки бул їх дакедишнї директор Иван Чабиняк.
До Свиднїку у Словацкей новосадски и коцурски танєчнїки одпутовали у орґанизациї Союзу Руснацох Українцох Сербиї, партнерскей орґанизациї Союзу Русинох-Українцох Словацкей Републики, котри традицийно главни орґанизатор того фестивала, и там пребували о трошку домашнього Союзу.
