РУСКИ КЕРЕСТУР – На Гиподроме Леї у Руским Керестуре, внєдзелю, 21. юния отримани ище єдни успишни порядни конїцки дринґацки обегованя, хтори и по горуцим юнийским дню нащивело солидне число патрачох.
Тогорочни дринґацки обегованя провадзело менєй патрачох як прешлих рокох, а нажаль, нє обеговал ше нїхто зоз Руского Керестура. Були порихтани шейсц обеговацки точки и участвовали коло 50 конї, а шицки точки ше бежали на 1.800 метери.
Кажде обегованє ношело свою окремну назву, у зависносци од спонзорства, та ше медзи менами нашли: Занатлиї – привреднїки и польопривреднїки, Месна заєднїца Руски Керестур, Конїцки клуб „Русин”, Општина Кула, XXI Мемориял „Вяри 89”, и „Dream Cather” д.о.о. – Зомбор.
Опрез каждей точки отримани дефиле запрагох, а зоз свою запрагу бул Керестурец Драґан Николич, док после каждого обегованя Добродзечне огньогасне дружтво (ДОД) полївало дражку, а потим ше ю ровнало же би була порихтана за шлїдуюце обегованє.
По законченю обегованя у каждей партиї додзельовани награди найуспишнєйшим и погари за освоєни перши места хтори додзельовал Желько Папуґа предсидатель КК „Русин”.
Дринґацки обегованя у Руским Керестуре нащивел и преславени сербски кошаркаш Никола Йокич, хтори потримал и помогнул у финансованю єдней точки, у хторей ше змагал и його конь.
И того року за добру орґанизацию обегованьох були задлужени – Желько Папуґа, Иґор Надь, Юлиян Будински, Янко Плачнак, Иґор Папуґа, як и велї други хтори помогли у орґанизациї. Орґанизатор конїцких дринґацких обегованьох у Руским Керестуре бул КК „Русин”, док покровитель обегованьох Општини Кула.
