Яке положенє рускей народней шпиванки у нашим културним милєу, то питанє котре, верим, окрем мнє, мучи велїх котри у швеце рускей музики. Хто дзба о тим же бизме могли нєзавадзано „шпивац” на нашим язику и почитовац тих котри ше у прешлосци намагали през писню виражиц чувства, зачувац традицию, описац каждодньовосц…
Музика у живоце каждого чловека забера барз значне место и провадзи го през цали живот. Шпиванка вше ту кед ше случую найзначнєйши ствари у нашим живоце, од родзеня, свадзбох, означованьох значних животних збуваньох, як и на концу, кед одходзиме до вичносци. Часто людзе знаю повесц же тот хто шпива, лєм ужива. И то правда, алє кед слово о твореню нових шпиванкох, вец реалносц нє цалком така як випатра з боку. А то найлєпше знаю людзе котри творя. Талант вшелїяк основне предусловиє, лєм то нє достаточне. Потребна потримовка, лоґистика, продукция и промоция, а то вообще нє наївна ствар.
Того року, 5. марца, по 27. раз, Фестивал новей рускей народней шпиванки „Ружова заградка” да доприношенє нашей новей музичней творчосци. През шицки тоти роки редакциї програми на руским язику Радия и Телевизиї Войводини витирвало, и попри обставинох у котрих жиєме, вжали на себе одвичательносц оможлївиц же бизме творели нови руски шпиванки. Даваю и потримовку, и лоґистику, и продукцию, и промоцию, остатнїх рокох вше лєпшу и професийнєйшу.
Учашнїк сом шицких, потераз отриманих „Ружових заградкох”, як интерпретатор, автор текстох и музики. Праве прето сом и свидома значносци и улоги котру у тей хвильки ма тот Фестивал, котри єдини таки у РТВ-у. Тота медийна хижа тераз и єдина котра ше стара о новей народней музичней творчосци Руснацох як институция, бо другу, озбильнєйшу продукцию нє маме. Кед ше шветла после фестивалского вечара погаша, оставаю нови твори и дзечнє их слухаме.
Числени шпиванки зажили медзи людзми, можеме их чуц на свадзбох, балох, вешельох… И теди нїхто нє роздумує же як настали, кельо усиловносци було потребне же би шпиванка вошла до народу. Нє мож занєдзбац факт же Фестивал „Ружова заградка” и „руски”, и же Руснаци конзументи того цо Фестивал випродукує. Та чи, вец, нє лоґичне же би ше о музичней творчосци, окрем РТВ-у и упартих поєдинцох з тей хижи, старали и институциї котри маю дзбац о Руснацох? Потребни амбиєнт у котрим би ше озбильно роздумовало о авторох, интерпретаторох, як их потримац, як им помогнуц, а нє охабиц их з боку же би и далєй були лєм ентузиясти.
Часто роздумуєм же у чаше кед маме формовани институциї котрим задача старац ше, медзи иншим, и о нашей култури, музика вше дзешка з боку. Вшелїяк же язик, писмо, образованє, информованє, сущни за Руснацох, алє кед слово о обласцох у култури, видзи ше ми же музика нє спада до обласцох котри найзначнєйши. Велї би, можебуц, дали предносц литератури, подобовей уметносци, або другим файтом уметнїцкого вислову. Вшелїяк, наздавам ше же ше, попри РТВ-а, и руски институциї буду старац же би нам шпиванка нє зацихла. У чаше ґлобалней повязаносци, можебуц шпиванка способ за приблїжованє Руснацох ґу цалому швету, бо музика нє ма гранїци и препреченя.
