КОЦУР – Роботне цело за младеж Националного совиту Руснацох вчера, 9. априла, у Коцуре отримало першу порядну схадзку на хторей бешедоване о планованих активносцох у тим року и розподзельованю пенєжу за обласци хтори млади планую „покривац“. Попри активносцох хтори буду реализовац члени Роботного цела, одлучене же би ше розписало явни конкурс за софинансованє активносцох за младих. Вон тих дньох будзе обявени на сайту Националного совиту (НС), а будзе тирвац до конца мая.
Понеже НС того року розполага з векшим буджетом як прешлого, и Роботне цело за младеж достало 50 000 динари вецей, та тогорочни буджет виноши 400 000 динари. З того 180 000 динари опредзелєни за проєкти по явним конкурсу.
Млади ускладзовали календари манифестацийох, односно активносцох хтори буду отримовац през рок. О своїх планох на вчерайшей схадзуки конкретнєйше бешедовали представителє Руского Керестура и Нового Саду, а порадзене же шицки члени Роботного цела буду сотрудзовац у витворйованю проєктох.
На схадзки присуствовали 9 з 12 членох Роботного цела за младеж – з Руского Керестура, Нового Саду, Коцура, Вербасу и Зомбора, верификовани мандат новому членови – Борисови Бесерминьови з Нового Орахова, та тераз тото цело ма 13 членох. Окрем членох Роботного цела, на схадзки присуствовали и предсидатель Вивершного одбору НС Желько Ковач и секретар НС Таня Арва Планчак.
