КАНАДА/МЕКСИКО/ЗАД – Шветове першенство у фодбалу почало штварток, 11. юния и будзе тирвац по 19. юлий кед ше одбави фельке финалне стретнуце, на стадиону Метлайф у Америки.
Закончело ше бавенє по ґрупох, кед ше внєдзелю 28. юния, вчасних годзинох одбавели шицки стретнуца у ґрупней фази змаганя. Фаворити ше визначую, медзитим як и на каждим першенству єст и нєсподзиваня.
Истого дня, внєдзелю, 28. юния, одбавене и перше стретнуце 1/16 финала, кед єдна з домашнїх репрезентацийох того Шветового першенства – Канада, бавела процив репрезентациї Южней Африки.
По тераз, дебитанти на Мундиялу ше нє преславели, у своїх ґрупох су на остатнїх местох, лєм Зеленортски острова освоєли 3 боди, зоз хторима ше им удало пласовац ше до нокаут фази и праве су нєсподзиванє на першенству.
У змаганю по ґрупох, найвецей розчаровали репрезентациї Ческей и Турскей хтори закончели як остатнї у своїх ґрупох, док од Африцких репрезентацийох, и попри доброго бавеня, репрезентация Сенеґалу завжала треце место у ґрупи, алє виборела пласман до 1/16 финала.
Найшвидши ґол на Мундиялу 2026 дал параґвайски фодбалер Матияс Ґаларза, хтори дал ґол лєм после 64 секунди бавеня. Зоз чим звалєни рекорд хтори тримал марокански репрезентативец Исмаила Сиабария, хтори дал ґол после 71. секунди бавеня.
У ґупней фази змаганя, шицки три побиди у ґрупи маю репрезентация Мексика, хтора и домашня, потим актуални шветови шампион Арґентина, и вицешампион репрезентация Французкей.
Найлєпши стрилєц першенства по тераз то Меси (Арґентина) хтори дал 6 ґоли, а провадза го Винициюс (Бразил) хтори дал 4, а тельо ґоли дали и Халанд (Норвежска), Ембапе (Французка) и Дембеле О. (Французка).
На Шветовим першенству 2026. року звалєни даскельо историйни рекорди:
1. Найефикаснєйши турнир по тераз – поствени нови рекорд по числу датих ґолох (196), зоз чим ше обегло рекорд зоз Катару (172).
2. Лионел Меси постал найлєпши стрилєц на Шветових першенствох, а поставел нови рекорд зоз вкупно 18 датима ґолами.
3. Найнащивенши Мундиял у историї – турнир уж звалєл рекорд у вкупним числу патрачох, (вецей як 3.605.000), у першей фази змаганя. Звалєни рекорд и на дньовим уровню, дзе у єдним дню стретнуца нащивели аж 384.206 патраче.
4. Найвецей дати авто-ґоли (12), уж у ґрупней фази бавеня.
5. Лионел Меси, Кристияно Роналдо и Ґилєрмо Очоа постали перши фодбалере хтори участвовали на аж шейсц розличних Мундиялох.
6. Кристияно Роналдо постал перши бавяч у историї котрому ше поспишело дац ґоли на шейсц розличних Шветових першенствох.
7. То перше Шветове першенство на хторим участвую 48 репрезентациї.
8. Репрезентация Куракао постала найменша держава хтора бавела на Мундиялу. Тиж, звалєни и рекорди за найстаршого менаджера котри водзел екипу на першенству, як и найстаршого селектора.