Василь Ябур добитнїк Награди Александра Духновича

автор зам  фото лем.фм
1.1k Опатрене

ПРЕШОВ (СЛОВАЦКА) – Тогорочни добитнїк Награди Александра Духновича доц. др Василь Ябур к.н. зоз Словацкей, єден з кодификаторох русинского литературного язика у Словацкей, котри того року означує и 80 роки живота. Награда му уручена 3. новембра на Науковей конференциї з назву „Динамични процеси у сучасней славистики”, пише портал лем.фм.

Ювилантови, визначному русинскому язикознавцови Награду Александра Духновича придала др Ана Плишкова, директорка Институту русинского язика и култури Прешовского универзитету, а о др Ябурови и процесу кодификованя русинского язика у Словацкей з тей нагоди бешедовала и Ябурова сотруднїца у тей роботи и бувша предсидателька Русинскей оброди мр Ана Кузмякова.

4-Jabur-02

Попри Награди Александра Духновича, терашнї предсидатель Русинскей оброди Мартин Караш др Васильови Ябурови, як єдному з найвизначнєйших познавательох русинского язика, за доприношенє у його кодификованю и розвиваню придал и окремне Подзекованє Русинскей оброди. Ґу тому, з нагоди його 80 рокох и за розвой русинстики, на истей шветочносци др Ябур достал и награду Прешовского универзитету (ПУ) Бронзову медалю, а придал му ю проректор Универзитету др Милан Портик. Бронзову медалю ПУ за розвой русинистики достал и др Михаил Капраль з Мадярскей.

Награду Александра Духновича роки додзелює Карпаторусински наукови центер зоз ЗАД за русинску литературу, алє того року Центер одлучел же Награду, хторей главна ознака брнозова скулптура карпатского медведза, додзелї др Васильови Ябурови за його вельке доприношенє у кодификованю русинского язика, без чого би, як гварене –  нє було анї литератури на нїм. Вєдно з др Ябуром, главни кодификатор русинского язика у Словацкей бул др Юрий Панько, а язик службено кодификовани 27. януара 1995. року у Братислави.

Спомнута наукова конференция „Динамични процеси у сучасней славистики” отримана 3. и 4. новембра и розпатрала теми з русинистики и болгаристики, а була пошвецена и 80 роком народзеня др Василя Ябура.

4-Jabur-03

ПОВЯЗАНИ ТЕКСТИ