Винайсц способ за наплацованє такси за явни сервиси

автор сен
664 Опатрене

БЕОҐРАД – Од 2016. року почнє наплацованє таксох за нашо два явни сервиси – Радио-телевизию Войводини (РТВ) и Радио-телевизию Сербиї (РТС), а уж ше нагадує же будзе проблеми, понеже мали процент людзох порихтани плациц таксу.

Предплата за явни сервиси дочасово утаргнута 2014. року, а тераз тота обовязка плаценя преформулована до „такси за РТВ”. Пред тим як предплата утаргнута, медийни фаховци спозорйовали же о два роки будзе чежко знова увесц тото плаценє, окреме прето же тоти котри нє плацели – нїґда нє були санкционовани.

Директор РТС-у Драґан Буйошевич виражел наздаванє же Влада Сербиї риши проблем наплацованя такси и здогаднул же то єй законска обовязка. Вон дума же тераз чежко наплациц таксу, понеже рочнє бидзе 6 000 динари, а трошки судского вивершителя у случаю нєплаценя 10 000, цо значи же би вец явни сервиси були у минусу. За функционованє РТС-у потребни 90 милиони еври, оценєл Буйошевич.

Явни сервиси у других державох од наплацованя предплати, лєбо такси, доставаю значну суму пенєжу, та так Горватска радио-телевизия рочнє достава од 180 до 220 милиони еври, Фински явни сервис 455 милиони, а Австрийски милиярду еври.

ПОВЯЗАНИ ТЕКСТИ