РУСКИ КЕРЕСТУР – Делеґация з места Тур`ї Ремети з општини Перечин у України, всоботу, 5. новембра, нєформално нащивела и Руски Керестур, а у рамикох свойого пребуваня у Вербаше.
Городоначалнїк Тур`ї Ремети Михал Биган, директорка тамтейшей Школи Антония Мегела и привреднїк Юрий Крупчински у Керестуре перше нащивели Школу „Петро Кузмяк”, дзе их дочекала директорка Хелена Пашо Павлович и предсидатель Совиту Месней заєднїци Владимир Олеяр.
Госци були барз заинтересовани опатриц шицко цо керестурска Школа и єй интернат понукаю, а пре можлїви приход дзецох з їх краю на школованє до Керестура. Опатрели и Спортску галу и Месну заєднїцу, дзе их домашнї упознали з условиями живота у валалє.
Под час пребуваня у Керестуре були госци и на парохиї, дзе их приял парох о. Михайло Малацко, опатрели Катедралну церкву и Марийово святилїще Водицу, а у тей нащиви провадзел их и керестурски привреднїк Елемир Рац и домашнї у Вербаше – предсидатель КПД „Карпати” др Деян Загорянски.
