ШИД – Всоботу, министер польопривреди, водопривреди и лєсарства Бранислав Недимович, ґенерални директор „Сербияґазу“ Душан Баятович и предсидатель Општини Шид Зоран Семенович шветочно прештригли пантлїку на главней мерацей и реґулацийней ґазней станїци на уходзе до Шиду, а потим министер Недимович з прицисканьом ґомбички и урядово пущел ґаз до ґазней мрежи.
Баятович гварел же приключок на ґазну мрежу будзе коштац 780 еври у динарскей проциввредносци и же годно виплациц на 36 мешаци, а „Сербияґаз“ у Шидзе отвори канцеларию дзе ше буду примац прияви за ґазни прключки.
Додал и же Сербия будзе мац достаточне количество ґазу по цени хтора будзе на моци по конєц мая и же єст достаточни количества бензину, дизелу и мазуту.
Министер Бранислав Недимович гварел же општина Шид од тераз будзе прицагуюцша за страних инвеститорох, а и продукователє догану у Куковцох риша проблем енерґента за свойо сушарнї за доган.
Предсидатель Општини Зоран Семенович визначел же то велька подїя на хтору ше чекало децениями и же будзе вецей фабрики и роботни места у општини.
