КОЦУР – На главней програми Фестивалу фолклору Руснацох и других националних заєднїцох „Коцурска жатва 2015”, всоботу, 11. юлия у Велькей сали Дома култури у Коцуре, хтора почала з гимну Републики Сербиї и шветочну шпиванку Руснацох у Сербиї, Фестивал привитали подпредсидатель Општини Вербас Милан Ґлушац, предсидатель Национланого Совиту Руснацох Славко Рац и подпредсидатель Покраїнскей влади и покраїнски секретар за привреду, обезпечованє роботи и ровноправносц полох Мирослав Васин.
– Жадам визначиц же праве тота розличносц, богатство и квалитет змистох хтори будую гражданє нашей општини розличней вири, нациї, язика и култури – то нашо найвекше богатство и правдива вредносц хтору з окремну увагу чуваме и з хтору ше цешиме – гварел Ґлушац у привитним слове.
– Пред пейцома роками зме заплановали и визначели нашо манифестациї од националного значеня, а медзи нїма єдна з найзначнєйших то и наша „Коцурска жатва”. Ниа, уж 27 роки Коцурска жатва пестує нашу културу, нашу традицию, указує тото цо у нас найлєпше. Национални совит основал и подручни канцелариї по наших местох, же бизме ше цо баржей приблїжели нашому чловекови, котри можебуц и нє зна хтори шицко права ма, и же Република Сербия ма єден з найвисших стандардох у Европи кед слово о людских и мешинских правох – гварел предсидатель Националного совиту Руснацох Славко Рац, котри тоту нагоду вихасновал и поволац младих родичох же би уписовали свойо дзеци до руских оддзелєньох.
– Єдно з тих правох то и право на образованє на своїм мацеринским язику. Нажаль, єст етапи и периоди кед тото право нє барз анї хаснуєме. Наздавам ше же похопиме же нам то найважнєйше и же то фундамент нашого дальшого постояня – гварел предсидатель нашого Совиту Славко Рац.
Подпредсидатель Покраїнскей влади Мирослав Васин наглашел же праве пре свою мултикултуралносц, АП Войводина єдинствена у Европи.
– Сиґурне же Войводина и єй рижнородносц, мултиетнїчносц и колорит яки нє постої у Европи то дацо з чим ше Себия найвецей цеши. Тото нашо поцешенє настало з таких манифестацийох, а єдинственосц з намаганьох националних заєднїцох у Войводини же би очували свою културу, указали свою особносц, свою розличносц, як и же почитую свою, алє и традициї и култури нацоналних заєднїцох з хторима вєдно жию на тим просторе хтори ше вола Войводина – гварел Васин.
Попри спомнутих, на закончуюцей програми Фестивалу всоботу вечар присуствовали и народна посланїца Олена Папуґа, члени НС Руснацох, делеґация Руснацох з Горватскей, директор Заводу за културу Войводянских Руснацох Серґей Тамаш, директорка НВУ „Руске слово” Мартица Тамаш, представителє церквох, представителє делеґациї Курова, зоз Словацкей, на чолє з Миланом Буйдом, предсидатель МЗ Коцур Желько Бєлан, та представителє установох, институцийох здруженьох и медийох.
Фестивал фолклорних традицийох Руснацох и других националних заєднїцох „Коцурска жатва 2015” финансийно помогли Општина Вербас, Национални Совит Руснацох, Покраїнски секретарият за културу и явне информованє, Покраїнски секретарият за образованє, предписаня, управу и национални меншини-заєднїци, Покраїнски Секретарият за привреду, обезпечованє роботи и ровноправносц полох, Месна заєднїца Коцур и д.о.о. „Либела Продукт” Змаєво.
Вецей фотоґрафиї на правим боку нашого сайту у окремней ґалериї з Фестивалу „Коцурска жатва 2015”.
