КУЛА – Штварта схадзка Скупштини општини Кула отримана вовторок, 30. юния, у Велькей сали СО Кула, улїца Ленїнова число 11. На схадзки були присутни 37 одборнїки, а на дньовим шоре були 14 точки.
У фокусу схадзки бул Предлог Одлуки о консолидованим Закончуюцим рахунку буджету општини Кула за 2025. рок и Звит о витвореню Одлуки о буджету општини Кула за 2025. рок. Визначене же утвердзени звишок у буджету виноши 305 милиони 716 тисячи динари хтори ше преноши до идуцого року, а нєрозподзелєни звишок 29 милиони 10 тисячи динари, цо потримали и похвалєли представнїки власци. Представнїки опозициї дали зауваги же ше троши вельки стредства на проєкти хтори нє злєпшую квалитет живота гражданох, а за звишок у буджету визначели же то знак же велї проєкти анї нє витворени. Як єден зоз прикладох наведзена и керестурска Дзецинска заградка „Цицибан”, за хтору прешлого року плановане 46 милиони динари, а по тераз потрошени лєм коло милион.
На схадзки прилапени и Предлог Одлуки о порушованю поступку прибавяня до явней власносци општини Кула нєрухомосци зоз нєпоштредну догварку, односно купованє хижи хтора ше вяже на Дзецинску заградку „Цицибан”, за потреби преширеня капацитетох оводи у Руским Керестуре.
Прилапени и Предлоги одлукох о прилапйованю звитох о роботи установох, чий снователь општина Кула за 2025. рок, та так прилапени и звит о роботи Дома култури Руски Керестур за прешли рок.
Кед слово о кадровских ришеньох, на схадзки вигласани и пременки у Явним комуналним подприємстве „Руском” зоз Руского Керестура, та за предсидательку Надпатраюцого одбору менована Бояна Девич зоз Кули, а за члена Михайло Лойпур зоз Крущичу.