НОВИ САД – Европска мрежа процив худобства – Сербия, як часц проєкта Journalism-prize goes international, зоз потримовку Ерсте фондациї преглашела побиднїкох Националней награди Рефлексия за достоїнствене информованє о худобстве и социялней виключеносци за 2025–2026. рок.
Тогорочна награда пошвецена здогадованю на Давида Балича, длугорочного члена жирия чий глас роками формовал вредносци тей награди. Жири бул составено виключно з особох зоз искуством худобства и социялней виключеносци, а награди достали роботи хтори чуваю достоїнство особох о хторих ше пише.
Побиднїки у катеґориї Рефлексия: Гласи зоз циню
– Друковани и онлайн медиї: Медзинародни дзень бездомних особох як опомнуце: Гоч хто може страциц власни дом, авторе Анастазия Ґоведарица и Марко Банатски (Машина); Власни дом нє луксуз, авторка Аня Андюшич (Лицеулице).
– Радийски прилог: Дньовнїк диханя – Иштван Фаркаш, авторе Фабрика креативносци и Иштван Фаркаш, подкаст сериял обдумала и реализовала продукцию Александра Бучко (Фабрика креативносци).
Медийска фотоґрафия: Серия фотоґрафийох: Свойо обисце зоз собу ношим, авторка Мария Янкович (Лицеулице).
Награди додзелєни на подїї Рефлексия: Цо думаце о институцийох и безпечносци? (Представянє резултатох виглєдованьох явносци и додзельованє награди Рефлексия за етичне информованє о худобстве) у просторийох Нєзависного дружтва новинарох Войводини (НДНВ), всоботу, 27. юния.
