КУЛА – Општину Кула вчера, 7. октобра, нащивел предсидатель Покраїнскей влади Иґор Мирович зоз сотруднїками, и после розгварки з чолнїками Општини, на чолє з єй предсидательом Перицом Видеканїчом, та обиходзеня роботох у Крамеровей улїци у Кули и индустрийней зони, обецал же Покраїна уж такой, а вец и до конца того рока, финансийно поможе Општини у запровадзованю дзепоєдних роботох, насампредз у ришованю еколоґийно-комуналного проблему зоз заґадзеносцу Велького бачкого беґелю.
Предсидатель Покраїнскей влади виражел задовольство же Општина Кула ма пририхтани проєкти и обезпечну часц средствох за нїх, же и сама роби на ушореню комуналней инфраструктури и потвердзел же ше, у складзе з опредзелєньом Влади Сербиї, Покраїнскей влади и локалних самоуправох, и у кулскей општини будзе робиц на моцнєню привредних капацитетох. У Кули за тото уж обезпечна окремна индустрийна зона, до хторей за три роки вибудови уложени коло 44 милиони динари обезпечени з републичного уровню и з општинского буджету, а як поведзене, Покраїна поможе у єй закончєню, у часци опреманя з технїчнима капацитетами хтори хибя.
Покраїнски премиєр окреме наглашел же ше барз пошвидко почнє конєчно ришовац найчарнєйшу еколоґийну точку у тей часци Европи – заґадзеносц Велького бачкого беґелю, цо уж почало з вибудову главного Поцискуювого воду за систему канализациї, по пречисцовач у Вербаше.
– Ушоренє того беґелю, длужни коло 6 километри, пририхтуєме як єдну з найважнєйших инвестицийох Войводини и заслужує нашу заєднїцки увагу – ресорного министерства, Покраїнскей влади и општинох Кула и Вербас. Догварели зме ше же би Покраїнска влада, „Води Войводини” и два општини подписали спорозуменє о заєднїцким ришованю того проблему, хторе, як рахуєм, будзе подписане о даскельо мешаци – гварел Мирович вчера у Кули.
Покраїнска влада уж такой опредзелї средства за добудов Штреднєй економскей школи у Кули, а слово о 5-6 потребних учальньох, потолковал предсидатель Општини Кула Перица Видеканїч и виражел подзекованє покраїнскому премиєрови нє лєм на приходу, алє и на тим же, як гварел – покраїнска власц конєчно ма порозуменя и за проблеми менших локалних самоуправох, як цо то и кулска.
После Кули, госци и домашнї вчера нащивели и Червинку, дзе на ютре буду виберанки за Совит Месней заєднїци.
