СУБОТИЦА – У рамикох 15. Културней манифестациї „Днї Балинта Вуйкова – днї горватскей кнїжки и слова”, хтору ше отримує од 6. по 8. октобер у Суботици, вчера, 7. октобра, у Читальнї Городскей библиотеки було Совитованє з тему „Литература за дзеци на меншинских язикох у Войводини”, на хторим представена литературу за дзеци на мадярским, горватским, румунским, словацким, ческим и руским язику.
О видаваню кнїжкох за дзеци на руским язику у НВУ „Руске слово” – перше у РНПД, кед 1929. року видрукована перша кнїжка за наших наймладших читачох, та по нєшка, алє и о видавательстве Дружтва за руски язик, литературу и културу и у Заводу за видаванє учебнїкох на Совитованю бешедовала писателька Мелания Римар.
Як провадзаца програма, на Дзецинским оддзелєню Городскей библиотеки пририхтана вистава кнїжкох, дзе медзи другима були виложени и даскельо наслови руских писательох. Роботи хтори на Совитованю представени у скраценей форми, у цалосци буду обявени у окремним зборнїку.
– Литература за дзеци фундамент каждей литератури. Хто од малючка нє будзе роснуц з кнїжку написану за ньго, нє будзе читац анї як одроснути. Руснаци ше нє можу поносовац же нє маю писательох, гоч знаме же за дзеци нєшка активно пишу лєм даскельо авторе алє, нажаль, до швета литератури за дзеци нє уходза млади – медзи иншим наглашела Римарова.
Шицки учашнїки на Совитованю ше зложели же барз важне и прекладац, як з меншинских язикох на сербски, так и зоз сербского на язики меншинох, бо то мости хтори нас буду повязовац, а як заключене – кед частейше будземе наступац вєдно, будземе моцнєйши и у глєданю средствох, у прекладаню и у пласованю кнїжкох.
Манифестацию потримали Город Суботица, Министерство култури и информованя Републики Сербиї, Национални совит Горватох, Покраїнски секретарият за образованє, предписаня, управу и национални меншини-заєднїци и Покраїнски секретарият за културу, явне информованє и одношеня з вирскима заєднїцами, а соорґанизаторе Городска библиотека Суботица и Завод за културу войводянских Горватох.
