ШИД – Лиґа социял демократох Войводини (ЛСВ) представела свою програму виберачом у Шидзе. Предсидатель ЛСВ Ненад Чанак на промоциї гварел же тота странка остала дошлїдна своїм идейом и закладаньом и же за 26 роки постояня нє премєнєла програму.
Чанак винєсол закладанє ЛСВ за полну законодавну, вивершу и судску власц Войводини и заувагу же держава нєдостаточно почитує власни закони. Наглашел же шицки людзе муша буц єднаки – без огляду на националносц, виру, лєбо политичне опредзелєнє и виражел наздаванє же после виберанкох ЛСВ формує покраїнску власц.
Заменїк покраїнского секртетара за польопривреду, водопривреду и лєсарство Бранислав Кнежевич бешедовал о актуалних проблемох у польопрвреди, з акцентом на даванє державней жеми под аренду. Гварел же ЛСВ процив того же би странци доставали державну жем барз туньо и же ЛСВ збера подписи за референдум о законє о польопривредней жеми.
О закладаньох ЛСВ бешедовали и покраїнска посланїца Мая Седларевич и народни посланїк Дьордє Стойшич, поволуюци гражданох же би 24. априла вишли на виберанки и гласали, наглашуюци же наиходзаци виберанки найзначнєйши од 2000. року.
