ШИД – З нагоди Дня општини Шид и 71. рочнїци ошлєбодзеня Шиду, Општински одбор здруженя борцох Народно-ошлєбодительней войни (НОВ) вчера у сали Скупштини општини Шид отримал Шветочну схадзку, а у сали Културно-образовного центру отримана централна програма.
На шветочней схадзки Здруженя борцох НОВ хторей о ошлєбодзеню городу и борбох у Другей шветовей войни бешедовали член Предсидательства борецкей орґанизациї Шид Душан Лукич, предсидатель борецкей орґанизациї АП Войводини Светомир Атанацкович, началнїк Сримкого управного округу Илия Милинович и предсидатель Општини Шид Никола Васич, а школяре Основней школи „Сримски фронт” виведли кратши рецитал.
Шветочносц предлужена на городским теметове при памятнїку погинутим борцом, дзе поховани коло 2 500 борци. Квеце и венци на памятнїк положели делеґациї Општини Шид, покраїнскей орґанизациї борцох и Шиду, городох Сримска Митровица и Индїя, делеґациї Социялистичней партиї Сримскей Митровици и Шиду и Одряду горякох „Лазар Бибич”, а священїки Сербскей православней церкви служели панахиду.
Централна манифестация з нагоди Дня општини Шид и Дня ошлєбодзеня отримана вчера у сали Културно-образовного центру, дзе отримана Шветочна схадзка Скупштини општини Шид. Винчуюци рочнїци, предсидатель Општини Никола Васич гварел же нє шмеме забуц на геройство согражданох котри дали животи за шлєбоду и же то муша почитовац и нови ґенерациї.
На шветочносци додзелєне и найвисше општинске припознанє – „,Децемберска наґрада”, хторе того року достало Дружтво сербско-русийского приятельства, а припознаня достали новинарка Оливера Убавич, поета Веселин Вучкович, режисер Цветин Аничич, та Ґойко Крчмар, Слободан Сремац и Горяцко-спорстке дружтво „Желєзничар”.
У академскей часци шветочносци виведзена театрална предства „Кельо од шлєбоди”, у режиї Цветина Аничича.
