НОВИ САД – Новинско-видавательна установа „Глас люду” вчера, 19. октобра, у своїх просторийох у будинку „Дневнику” у Новим Садзе означела свою 71-рочнїцу постояня. Присутних привитал директор Самуел Жяк и упознал их з актуалним станом у тей медийней установи Словацох у Сербиї, док о самих новинох „Глас люду” бешедовала їх главна и одвичательна редакторка Владимира Дорчова- Валтнерова.
З тей нагоди уручени и традицийни рочни Награди за вирносц Установи, як и новинарски награди за час од октобра 2014. по септембер 2015. року. Новинарски награди достали редакторка електронского виданя „Гласу люду” Ясмина Панїкова, редактор Владимир Гудєц, редакторка Елена Шранкова и дописователь з Ковачици Янко Такач. Тиж так, Часопис за младих по словацки „Взлєт” додзелєл колективну награду Новинарскей секциї у ОШ „Маршал Тито” у Падини.
На швяточносци присуствовали и подпредсидателька Скупштини Войводини и предсидателька Националного совиту Словацох Ана Томанова Маканова, познати публициста зоз Словацкей Републики Мартин Касарда, директор „Дневнику” Светозар Каранович и директорка НВУ „Руске слово” Мартица Тамаш, велї терашнї и дакедишнї роботнїки НВУ „Глас люду”, як и других медийних установох националних заєднїцох у Войводини.
