ВЕРБАС – Општини Вербас 13. децембра уручени сертификат ИСО 9001, стандард хтори ушорює дїлованє каждей орґанизациї. Тот сертификат потвердзує конкурентносц на ґлобалним тарґовищу, високи ступень и виєдначеносц квалитету глєданих услугох. Карактеризує го континуоване унапредзованє шицких процесох и медзинародно є припознати.
Сертификат предсидательови Општини Миланови Ґлушцови уручел директор сертификацийного цела „Ґлобал Серт Интернационал” з Беоґраду Синиша Абрамович, пише портал Општини Вербас.
Општина Вербас, односно Општинска управа, за остатнї рок усоглашела свою систему зоз стандардом ИСО 9001, а ма и подполну компетенцию за його дальше унапредзованє.
Ґлушац визначел же Општина Вербас уж ма и сертификат 50001, цо характеристика општинох у Европи, а на прагу є уводзеня сертификату БСИ, цо значне за потенциялних инвеститорох.
– Пробуєме направиц цо модернєйшу администрацию на хасен гражданох, же би шицки свойо вимоги у локалней самоуправи реализовали ефикасно и швидко – гварел Ґлушац.