ОСИЄК – У орґанизациї КУД Руснацох Осиєк, всоботу, 5. децембра, у Осиєку отримани 11. „Дравски габи” – стретунаца хорох и шпивацких ґрупох Руснацох Републики Горватскей. Наступели шейсц руски дружтва з Горватскей, Матица Словацка з Осиєку и єдно руске дружтво з иножемства – зоз Сербиї, односно з Войводини.
З Горватскей участвовали шпивацки ансамбли КУД „Осиф Костелник” з Вуковару, КУД „Яким Гарди” з Петровцох, КУД „Яким Ґовля” з Миклошевцох, КД Руснацох з Винковцох, „Руснак” – Дружтва Руснацох у РГ, та домашнї – КУД Руснацох Осиєк. З Войводини наступели шпиваче з КУД „Петро Кузмяк” з Нового Орахова.
Програму провадзели коло 150 учашнїки и патраче, а перши раз того року КУД Руснацох Осиєк представало свою новоосновану меншу фолклорну секцию, чийо члени одтанцовала танєц „Черешенки”, у хореоґрафиї Звонка Костелника. Провадзел их тамбурови оркестер и хор домашнього КУД.
Госцох и учашнїкох привитала предсидателька КУД Руснацох Осиєк Агнетка Балатинац, а спред Координациї Руснацох РГ бешедовал предсидатель Борис Бучко. Спред Союзу Руснацох РГ присутних привитала предсидателька Дубравка Рашлянин, а манифестацию отворела подпредсидателька Совиту за национални меншини РГ Рената Тришлер.
Попри висланїкох орґанох з дружтвеного, политично и вирского живота у Републики Горватскей, на „Дравских габох” присуствовала и делеґация Националного совиту (НС) Руснацох у Сербиї – заменїк предсидателя НС Йовґен Мудри и предсидатель Вивершного одбору Совиту Желько Ковач.
Стретнуце отримане з финанцийну потримовку Совиту за национални меншини РГ, Осиєцко-бараньскей жупаниї и Городу Осиєк, як и спонзорох.
