РУСКИ КЕРЕСТУР – Детально анализуюци концом прешлого мешаца отримани 54. Фестивал рускей култури „Червена ружа”, члени Орґанизацийного одбору Фестивалу на вчерайшей схадзки у керестурским Доме култури бешедовали и о будуцей концепциї нашого найвекшого и найстаршого фестивалу.
На схадзки визначени добри страни тогорочного Фестивалу, як цо то квалитетна вистава, континуитет у отримованю „Червеного пупча”, отримованє Керестурского сайму, наступ госцуюцого ансамблу ПУЛС з Пряшова, як и квалитетни фестивалски вечар, на хторим ше змагали млади шпиваче и нови забавни композициї. Аналитично спатрени и дзепоєдни слабши сеґменти тогорочней „Ружи”, насампредз проблеми з озвученьом, слабши квалитет шпивачох на „Пупчу”, а окреме же треба подзвигнуц квалитет Шветочного концерту, у часци дзе наступаю нашо руски ансамбли.
Указало ше же терашня концепция соботовей програми нє одражує тото найлєпше цо витвориме у култури у єдней сезони, як и потреба же би ше, пред ревиялну програму, ознова уведло наступ КУД з наших местох з одредзенима точками, а вибрани, з найлєпшима и на Шветочним концерту.
Предложене же би ше винашло другу локацию за виставу, же би Керестурски саям починал познєйше, а тирвал и под час манифестацийох, та же би ше змаганє за найкрасши глас, на хторим убудуце муша участвовац и леґинє, и виводзенє забавних композицийох отримовало у сали Дому култури, як вельо вигоднєйшим просторе за таку програму. Потребне и скорей розписац конкурси за нови композициї, з чим би ше злєпшало їх пририхтованє, а окреме наглашена потреба уключованя младших до шицких сеґментох анґажованя у Фестивалє.
Идуца схадзка Орґанизацийного одбору будзе у другей половки септембра, на хторей би мала буц утвердзена и нова концепция Фестивалу и уж почало пририхтованє шлїдуюцого, пейдзешат пиятого.