РУСКИ КЕРЕСТУР – Совит Месней заєднїци (МЗ) Руски Керестур на вчерайшей схадзки прилапел закончуюци рахунок МЗ за 2015. рок, по хторим прейґ рахунку МЗ, лєбо Општини Кула (а за МЗ) вєдно прешли дацо вецей як 9,9 милиони динари.
Зоз самодоприносу у прешлим року утрошени 6 милиони 826 605 динари, з буджету Општини Кула 2 милиони 825 224 динари, а як власни приход витворени 339 896 динари.
Цалосни прилїв до самодоприносу по шицких трох основох (зоз плацох занятих, од польопривреди и на основи самостойней дїялносци) у 2015. року бул 10 милиони 251 033 динари, так же до того року зоз самодоприносу пренєшени 6 милиони 731 611 динари.
На вчерайшей схадзки основана и окремна комисия хтора спатри стан и предложи на хторих местох, односно улїцох, потребне ришовац одводзенє атмосферскей води, понеже ЯП „Завод за вибудов” Кула пририхтує розписованє явней набавки за чисценє яркох и потребни роботи коло ушорйованя атмосферскей канализациї по местох општини.
Члени Совиту вчера розпатрали и два молби – иницияторох за снованє нового Шаховского клубу, та им потребни пенєж за реґистрованє, як и Здруженя гражданох „Желєни персцень” за помоц зоз 20 000 динари у друкованю моноґрафиї.
Понеже финансийни план МЗ виробени концом прешлого рока, догварене же би Спортске дружтво „Русин” за Шаховски клуб у снованю опредзелєло часц пенєжу зоз средствох хтори наменєни за спорт зоз самодоприносу, а „Желєному персценю” МЗ може опредзелїц лєм средства хтори им у тим року зоз самодоприносу наменєни як дотация за здруженє гражданох.