РУСКИ КЕРЕСТУР – У Доме школярох Штреднєй школи „Петро Кузмяк” вчера вечар отримана едукативна роботня з тему „Меншински права у Сербиї”, хтору штредньошколцом презентовала млада адвокатка Силвия Орос з Керестура.
Педаґоґиня Школи Любица Няради Оросову представела и як дакедишню школярку тей Школи, перше основней, а потим и Ґимназиї на руским язику, єй нєдавно успишно закончену образовну драгу, а потим и роботню хтору пририхтала за школярох.
Оросова нєдавно участвовала на семинаре з исту тему о меншинских правох у Сербиї и з тоту парняцку едукацию наглашела єден з єй цильох – же би по роботнї голєм 30 одсто слухачох звекшали свою толеранцию ґу иншаким особом.
На викладаню бешедоване о меншинских правох националних заєднїцох з акцентом на руску, о правох ромскей заєднїци, особох з инвалидитетом и ЛҐБТ популациї, хторей була пошвецена и єдна векша часц роботнї.
