НОВИ САД – Шеф Кабинету городоначалнїка Нового Саду Александар Петрович и член Городскей ради за привреду Ґоран Сечуйски вчера, 10. марца, мали схадзку зоз совитнїком министра за дияспору Словениї Маряном Цукровим и представителями Дружтва Словенцох „Кредарица“ з Нового Саду, на хторей бешедовали о сотруднїцтве у обласцох култури и туризму, та о потримовки у повязованю привредїкох зоз Словениї и Нового Саду.
Понеже у Новим Садзе пошвидко буду отримани манифестациї „Днї славянскей писменосци“ и „Днї словенскей култури, привреди и туризму у Новим Садзе“, на схадзки порадзене же на нїх будзе участвовац и новосадске Дружтво Словенцох „Кредарица“.
Цукров гварел же словенске Министерство дияспори на єшень планує орґанизовац стретнуце городоначалнїкох городох подунайских обласцох пре пораду о можлївосцох заєднїцких проєктох з хторима би конкуровали за доставанє средствох з Европскей униї.