УЖГОРОД (УКРАЇНА) – З нагоди 160-рочнїци народзеня Ивана Франка, визначного українского писателя и науковца, Закарпатска обласна универзална наукова библиотека „Федор Потушняк” тих дньох обявела „Закарпатску Франкиану” – зборнїк наукових и публицистичних статьох, есейох, вибраних писньох и библиоґрафских жридлох.
У тим виданю першираз у єдней кнїжки позберани твори Ивана Франка, хтори потвердзую зацикавеносц того писателя, науковца и дружтвеного дїяча за историю, културу и тедишнї реалиї Угорскей Руси, т. є. нєшкайшей Закарпатскей обласци України, та роботи науковцох котри анализую уплїв творчосци и подоби Ивана Франка на дружтвени и културни живот Закарпатя. Попри тим, у зборнїку акумулована история закарпатского франкознавства и його жридлова база, а представени и уметнїцки твори сучасних писательох пошвецени Франкови.
Попри велького числа українских, у зборнїку и роботи иножемних авторох, а медзи нїма и Миколи М. Цапа, одвичательного редактора часопису „Шветлосц”, котри представени з двома роботами: „Прилог Ивана Франка преучованю сербского апокрифа XVIII столїтия” и „Иван Франко и Руснаци и Українци Югославиї/Сербиї (Материяли за библиоґрафию)”.
Попри „Закарпатскей Шевченкиани”, хтора вишла 2014. року, то друге виданє подобней сериї, а пририхтала го Закарпатска обласна универзална наукова библиотека у Ужгородзе.