НОВИ САД – Вчера, 12. юлия, у грекокатолїцкей церкви св. апостолох Петра и Павла у Новим Садзе преславени Кирбай, 194. по шоре, а понеже того року швето було внєдзелю, на Кирбаю було и вецей парохиянох и їх госцох.
Архиєрейску Службу Божу предводзел преосвящени владика, кир Георгий Джуджар, а сослужели декан бачки и парох дюрдьовски о. Йоаким Холошняй, парох коцурски о. Владислав Рац, декан банатски, парох беоґрадски и сримскомитровицки о. Владислав Варґа, парох бачински о. Дарко Рац и о. Михайло Корцеба, котри службує у Анкони, у Италиї.
На Служби присуствовали и домашнї парох о. Юлиян Рац, парох ґосподїнски о. Михаил Холошняй, пензионовани новосадски парох о. Роман Миз, а споведал нововербаски парох о. Игор Вовк.
У своєй казанї владика Георгий гварел же святи апостол Петро перше бул рибар и ловел риби, а после му Исус дал нагоду же би бул рибар людских душох и зберал коло себе християнох.
На Кирбайскей Служби присуствовал и новоменовани амбасадор України у Сербиї Олександр Александрович зоз супругу Надїю, и треци секретар Амбасади Богдан Кост.
На концу Служби було мированє, а Кирбай предлужени у обисцох наших парохиянох у Новим Садзе з найблїзшима, госцами и приятелями.
