РУСКИ КЕРЕСТУР – Пияток, 26. юлия, закончени турнир у малим фодбалу 3 х 3 у Руским Керестуре, а шампионски погар на тогорочним турниру освоєла екипа Луксор Фурнитуре (Luxor furniture) зоз Руского Керестура.
Перше одбавене стретнуце за треце место медзи екипами Колосеум бет (Colosseum bet) зоз Руского Керестура и Ювентус (Juventus) зоз Вербасу а конєчни резултат того стретнуца бул 9:2 за екипу Колосеум бет.
У финалним стретнуцу моци одмерали два Керестурски екипи, Драґан Ковачевич и Луксор фурнитуре (Luxor furniture), а вельочислена публика могла уживац у возбудлївим и напартим стретнуцу дзе вецей щесца мала екипа Луксор фурнитуре, понеже до шампионского погара дошла после виводзеня пеналох. Резултат финалного стретнуца глашел 6:6 (1:2).
После законченого финалного стретнуца додзелєни припознаня – найлєпши стрилєц турнира бул Иван Рац зоз осем посцигнутима ґолами, а за найлєпшого бавяча турнира 3 х 3 преглашени Боян Бранкович зоз побиднїцкей екипи.
Пияти ноцни турнир у малим фодбалу 3 х 3 у Руским Керестуре закончени зоз огньометом. Орґанизатор турнира були Янко Хома и Иван Чапко.
