14. АВҐУСТ – На нєшкайши дзень народзел ше протоєрей ставрофор, о. др Роман Миз.
1457 – Ґутенберґова друкарня у Майнцу видала першу друковану кнїжку у фарбох.
1893 – У Французкей, першираз у швеце, уведзени реґистерски таблїчки на моторни превозки.
1932 – Народзел ше священїк, публициста, новинар, прекладатель протоєрей ставрофор, о. др Роман Миз (Дрогобич, Україна, 14. авґуст 1932 – Нови Сад, 13. новембер 2017). До Липовлянох у Горватскей фамелия ше приселєла 1933. року, та Роман Миз ту закончел основну школу. Класичну ґимназию, студиї, постдипломски семестри богословиї на Католїцким богословским факултету закончел у Заґребе. За священїка є пошвецени 1958. року, священїк бул службовал у Липовлянох и 1968. року пришол до Нового Саду дзе бул парох по 2013. рок. Позарядово студирал историю, историю уметносци и югославянску литературу, написал вецей як тисяч статї, сотрудзовал зоз велїма новинами и часописами. Протоєрей ставрофор, о. др Роман Миз Преподавал на Теолоґийно катехетским институту св. Алберт Вельки у Суботици и Новим Саду, на специялистичних академских студийох Универзитета у Новим Саду и Протестанским теолоґийним факултету тиж у Новим Саду. Роман Миз добитнїк велїх припознаньох котри му додзелєла найвисша церковна гиєрархия, алє и державни орґани України як и город Нови Сад. Роман Миз ше упокоєл у Новим Саду 13. новембра 2017. року, поховани є 18. новембра у Руским Керестуре.
1935 – Народзел ше културни дїяч у литератури Русинох у Словацкей Мирон Сисак (Пихна, Сниньски край, 14. авґуст 1935 – Прешов, 11. юлий 2018), бул професор на Универзитету у Прешове. Векшу часц свойого живота пошвецел педаґоґийней роботи, преподавал русински язик и литературу. Початком дзеведзешатих активно участвовал у процесу препороду Русинох у Словацкей, а бул и подпредсидатель Русинскей оброди у Словацкей.