26. АВҐУСТ – На нєшкайши дзень народзел ше бициґлиста Иван Давосир.
1839 – Основана Перша беоґрадска ґимназия, найстарша стредня школа у Беоґрадзе.
1906 – Народзел ше вирусолоґ Алберт Брус Сейбин (Бялисток, Русия, 26. авґуст 1906 – Вашинґтон, ЗАД, 3. марец 1993), пренаходзач вакцини процив полиомиелитиса, односно, оберацей дзецинскей парализи. Бул професор на Медицинским коледжу Универзитета у Синсинатию, ЗАД, а потим предсидатель Вайманового институту у Израїлу.
1910 – У Скопю ше народзела Мати Тереза, народзена є як Анєза Ґондже Бояджию (Скопє, 26. авґуст 1910 – Калкута, Индия, 5. септембер 1997), була часна шестра хтора у Калкути 1950. року основала здруженє Шестри мисионерки милосердия. Вецей як 2000 членїци рижних националносцох пошвецели ше худобним и хорим людзом у Индиї и на шицких континентох. Добитнїца є Нобеловей награди за мир 1979. року.
1961 – Народзел ше бициґлиста Иван Давосир (Нови Сад, 26. авґуст 1961 – Нови Сад, 31. октобер 2021), бул селектор репрезентациї Сербиї у горяцким бициґлизме. Року 1993. основал Клуб за горяцки бициґлизем Фанатик, чийо члени творели репрезентацию Сербиї. Тиж бул и найтрофейнєйши змагатель у горяцким бициґлизме, освоєл вецей раз Куп Югославиї, першенства Сербиї и Югославиї, Фрушкогорски-бициґлистични маратон, а освоєл и Шветови куп у мастерс катеґориї. Бул орґанизатор Фрушкогорского-бициґлистичного маратона, хтори од 2022. року ноши його мено и селектор репрезентациї у горяцким бициґлизме. Иван Давосир спочива на городским теметове у Новим Садзе.
