КУЛА – Вчера, 27. авґуста отримана 23. схадзка Скупштини општини Кула, на котрей медзи иншим з векшину гласох прилапена Одлука о вименкох и дополнєньох Одлуки о буджету Општини, а после длукшей дискусиї представительох власци и опозициї.
На початку схадзки длугорочни одборнїк Драґутин Медоєвич усмено задзековал на свою функцию. Потим нє прилапене дополнєнє дньового шора на предкладанє опозицийней одборнїцкей ґрупи „Кулянє и наш город – Зєдинєни за побиду Кули”. Глєдало ше формованє дочасовей комисиї котра би утвердзела политичну одвичательносц найвисших функционерох и представнїкох явних орґанох власци за инциденти на протесту 20. мая.
На схадзки Скупштини дискутовало ше и одлучовало ище о даскельо точкох на дньовим шоре, а то Звит о витвореню Одлуки о буджету Општини за перше полрочє, дати согласносци на веменки дїлованя ЯКП „Комуналєц” и „Руском”. А дати согласносци на програми роботи зоз финансийним планом установом чий снователь Општина, медзи нїма и Дом култури Руски Керестур. Принєшена и одлука розписац конкурс за директора Народней библиотеки Кула, а за нового директора Културнго центру Кула меновани Алаксандар Мосорка.