9. СЕПТЕМБЕР – На нєшкайши дзень народзели ше учитель Янко Дудаш Романча и новинар Мирослав Кевежди.
1737 – Народзел ше лїкар и физичар Луидї Ґалвани (Болоня, Италия, 9. септембер 1737 – Болоня, 4. децембер 1798), познати по тим же одкрил же мускули и нерви правя електрицитет, цо познєйше по нїм наволане ґалвански електрицитет.
1772 – Народзел ше писатель Йоаким Вуїч (Бая, нєшка Мадярска, 9. септембер 1772 – Беоґрад, 20. новембер 1847), бул литерата и ґлумец, єден з сновательох театралного живота у Сербиї и Войводини.
1776 – Америцки Континентални конґрес запровадзел урядову назву держави Зєдинєни Америцки Держави место Зєдинєни колониї.
1828 – Народзел ше писатель ґроф Лєв Николаєвич Толстой (Ясна Поляна, Русия, 9. септембер 1828 – Астапово, 20 новембер 1910), єден з велїканох шветовей литератури, автор романох Ана Каренїна и Война и мир.
1949 – Народзел ше учитель Янко Дудаш Романча (Руски Керестур, 9. септембер 1949 – Руски Керестур, 17. януар 2022). У родним месце закончел основну школу, а Стредню и Висшу учительску школу закончел у Зомборе. Як млади учитель почал робиц у керестурскей школи, а на тим роботним месце бул цали роботни вик. Попри роботи у настави, Янко Дудаш указовал и прихильносц ґу литератури и музики. Бул вецейрочни член жирию на Фестивалу Червена ружа, на його тексти компоновани шпиванки. Учитель Янко Дудаш упокоєл ше 17. януара 2022. року и спочива на керестурским теметове.
1951 – Народзел ше новинар, поета, ґлумец и режисер аматер Мирослав Кевежди (9. септембер 1951 – Дюрдьов, 11. юний 1998). Робел у Рускей редакциї Радио Нового Саду. Жил у Дюрдьове, дзе бул активни у драмскей секциї Културно уметнїцкого дружтва Тарас Шевченко, а найпознатши є по краткей гумористичней сериї Сватове. Упокоєл ше 11. юния 1998. року, спочива на теметове у Дюрдьове.