23. СЕПТЕМБЕР – Нєшка Европски дзень орґанских продуктох.
1846 – Нємецки астроном Йохан Ґотфрид Ґале пренашол планету Нептун.
1893 – У Беоґрадзе пущена до погону перша явна електрична централа у Сербиї.
1930 – Народзел ше шпивач и композитор Рей Чарлс Робинсон (Олбани, ЗАД, 23. септембер 1930 – Беверли Гилс, ЗАД, 10. юний 2004).
1962 – Народзела ше Хелена Корпаш (Дюрдьов, 23. септембер 1962 – Дюрдьов, 21. авґуст 2019), була новинарка и редакторка Рускей редакциї Радио-телевизиї Войводини. У своєй кариєри новинара и редактора провадзела шицки обласци, а найбаржей економию, цо єй бул и фах. Окреме будзе запаметана як редакторка емисийох за дзеци, хтори пририхтовала професийно и зоз вельку любову. Роками провадзела и польопривреду, а остатнїх рокох свойо интересованя пошвецела и вирским темом. Хелена Корпаш ше упокоєла у Дюрдьове, 21. авґуста 2019. року, спочива на дюрдьовским теметове.
Нєшка Шветови дзень бисексуалносци (Celebrate Bisexuality Day, International Bisexuality Day).
Медзинародни дзень знаковних язикох. Конвенция о правох особох зоз инвалидитетом ЗН препознава ровноправносц знаковних язикох зоз бешеднима язиками. У нашей жеми знаковни язик од 2015. Року законски припознати язик як средство комуникациї медзи глухима особами. Медзитим мало єст ресурси за ученє, та то єдно з найвекших виволаньох з яким ше стретаю глухи особи.
Европски дзень орґанских продуктох. Заєднїцку декларацию подписали Европски парламент и Совит и Комисия.