18. ДЕЦЕМБЕР – На нєшкайши дзень народзел у Кричкох о. Йован Хранилович.
1855 – Народзел ше новинар, поета, гуманиста, явни роботнїк о. Йован Хранилович (Кричке при Дрнишу, 18. децембра 1855 – Нови Сад, 5. авґуст 1924). До основней школи ходзел у Сошицох и Крижевцох. Перши рок богословских студийох закончел у Заґребе, а вец прешол до Бечу, за о. Йован Хранилович бул пошвецени за священїка 1878. року. Службовал у вецей местох у Жумберку, бул капелан у Коцуре и Руским Керестуре, у авґусту 1889. року постал грекокатолїцки парох у Новим Садзе. Єден час о. Йован Хранилович бул предсидатель новинарскей орґанизациї и редактор демократских новинох Єдинство. Предшедовал Велькей народней скупштини у Новим Садзе, 25. новембра 1918. року, на хторей принєшена одлука о присоєдинєню Войводини до Сербиї и до составу новоствореней держави Кральовини Сербох, Горватох и Словенцох. Анґажовал ше и коло отримованя Сновательней схадзки Руского народного просвитного дружтва у Новим Садзе 1919. року, обезпечел змесценє делеґатох и шветочну салу Новосадского маґистрата за отримованє зашеданя. На предлог о. Дюри Биндаса предшедовал и на Сновательней схадзки Руского народного просвитного дружтва 2. юлия 1919. року. Священїк Йован Хранилович умар у Новим Садзе 5. авґуста 1924. року, поховани є на новосадским руским теметове, його памятнїк у форми обелиска положела Новосадска секция югославянского новинарского здруженя з помоцу його приятельох и Бачких Руснацох, нєшка под защиту держави.
Нєшка Медзинародни дзень миґрантох.
