14. ЯНУАР – На нєшкайши дзень народзел ше Евґений Джуня.
1826 – У Пешту основана Матица Сербска на инициятиву Йована Хаджича и вецей богатих сербских пештанских и будимских тарґовцох. Тото литературне и културне дружтво мало огромну улогу у розвою науки и култури Сербох у Войводини. Видавало Лїтопис Матици сербскей, найстарши сербски литературни часопис. Матица 1864. року преселєна до Нового Саду, дзе є и нєшка.
1840 – У князовини Сербиї за школску славу преглашене швето на памятку на велького сербского просветителя и защитнїка школства святого Саву.
1875 – Народзел ше лїкар, филозоф, протестант и теолоґ, писатель, музичар и мисионер Алберт Швайцер (Кайзерсберґ, Нємецка, 14. януар 1875 – Ламбарене, Ґабон, Африка, 4. септембер 1965), добитнїк Нобеловей награди за мир 1952. року, хтори скоро цали живот пошвецел борби процив хоротох у Африки.
1900 – Виведзена премиєра опери Тоска Дякома Пучиния (1858–1924) у Риме у Италиї. Праве зоз оперу Тоска у новембре 2024. року у Сербским народним театре у Новим Садзе означени Дзень Опери СНП.
(1919–2000)
1919 – Народзел ше новинар, спикер и лектор у рускей редакциї Радио Нового Саду, член першого Редакцийного колеґиюма новинох Руске слово, професор, перши директор Прекладательней служби Скупштини АП Войводини Евґений Джуня (Руски Керестур, 14. януар 1919 – Нови Сад, 1. авґуст 2000). Основну школу закончел у Руским Керестуре, ґимназию у Заґребе, Педаґоґийну школу у Новим Садзе, а Правни факултет у Беоґрадзе. По законченю Другей шветовей войни бул меновани за наставнїка у новоотвореней ґимназиї, и бул єй директор. Бул єден з иницияторох за видаванє новинох на руским язику и член першого Редакцийного колеґиюма, концом 1949. року робел як спикер и лектор у Рускей редакциї Радио Нового Саду. Од 1955. року робел у стреднєй школи, а потим постава перши директор Прекладательней служби у Скупштини Войводини, як правнїк, остал по пензионованє 1987. року. Евґений Джуня умар 1. авґуста 2000. року у Новим Садзе дзе є и поховани на городским теметове.
Нєшка перши дзень Нового рока по Юлиянским календаре, хторого ше тримаю сербска, русийска, ґрузийска и даскельо менши православни церкви, штири стари патрияршиї и шицки святогорски манастири, як и часц рускей грекокатолїцкей церкви.